谈乐

Eric Kwok，甜到漏嘅《广东大碟》

广东大碟　|　Eric Kwok

Silly Thing

评分：71

老实讲我对Eric Kwok冇乜印象，知道郭伟亮个名又唔知道佢系点样，记得有Snowman同Swing又唔记得佢哋有啲咩歌。明明系半个幕後，又唔清楚佢啲歌系乜风格，明明系半个幕前，又净系清楚佢同叶佩雯一齐，写晒成张《On My Own》嘅歌。

冇晒印象仲好，当新人听。

第一plug嘅《晏》我觉得麻麻哋，听落好顺耳但都系争啲争啲，感觉好似《爱得太迟》咁呻苦，同成张碟甜甜蜜蜜嘅风格一啲都唔夹，好彩好快搵《应承》做第二plug，呢首真系掂好多，节奏慢得来唔会训着，好甜好冧好暖笠笠，编曲好有节日气氛，唔怪得近排播到烂晒都咁受欢迎。

不过要数成张碟最突出嘅，我会拣中间嗰几首，《是但，求其，冇所谓》好似去到加勒比海嘅沙滩一边行一边吹口哨，《冇得弹》玩Big Band，编排好顺，好热闹，但冇犯到妹仔大过主人婆嘅毛病，跟住唱之外唔会觉得嘈过龙。去到最大声都系玩少少Punk嘅《罗罗挛》，爽到晕，好耐冇听过会甜到入心嘅快歌，加埋林若宁嘅词玩得好正，同啲歌好贴好出，生鬼得嚟又唔觉得肉麻，捉得到叫做《广东大碟》呢个主题嘅神韵，要传神其实真系一啲都唔简单，用粤语入词，仲要系情歌，又唔系玩Rap，分分钟一下唔觉意就变成尹光。如果要就住就住，半文半白，好似跟住嗰几首小品《论尽》丶《而家》咁，净系得个歌名系广东话，内容都系文绉绉咁样，点都系隔咗一层，唔够到肉，苴咗啲。

一个人嚟讲呢只碟系Eric Kwok送畀叶佩雯嘅，一班人嚟讲呢只碟系畀麻甩仔嚟氹女仔嘅，一张甜到漏嘅《广东大碟》。

首选：罗罗挛

相关网页　|　全碟歌词　|　试听连结

延伸阅读：Eric Kwok【广东大碟】唱好自己