鄧穎芝未曾斷氣【Summer Never Ends】

Summer Never Ends | 鄧穎芝

Snazz Music

評分:28

有些歌手,單聽名字便沒有興趣,再憑印象更意欲盡失,而市道愈差,此等泛泛之輩就愈湧愈現,以為是一碟玩完,又偏偏得一想二,代表之一的鄧穎芝【V2】 之後死唔斷氣再有以【Summer Never Ends】為題的第三張專輯,既切合香港近年的炎冬境況,真的「十二月亦可破浪再出發」,也反映這類唱片作業的不死姿態。

方程式是先來闕幾十秒無關痛癢的Intro或喚作Prelude,無啦啦輕鬆的啦了幾下,導入主題曲《Summer Never Ends》的熱浪,普普通通青春可人的販賣,製作又是張繼聰,今年真努力。要配合熱褲小背心的形象,少不免整兩首跳舞嘢,即係唔知由Stephanie定Kary唱嗰啲,通常又會由夏至填詞,不過跟EO2 Eddie合作的《電光火石》算是「順耳流暢」、「值得一聽」嘅,高皓正寫的《繼續潮拜》就太爆了,「要跳到最High」喎,可惜「完場時掌聲再細.也大過納米」,唉。

熱鬧過後梗係要傷心情歌平衡一下,《別要走》喊晒口,《幼稚戀》怨三聲,即係唔知由Stephy定Twins唱嗰啲,《一個人的浪漫》玩下Jazz咁囉,免得過畀人話全部太K的指定動作。最後例牌就係一歌兩味,送多兩首國語版,再加MV再加Karaoke,對於這種製作模式,如果係一線歌星,大家就會話抵買,唔係嘅話就會大喊搵笨,難聽啲講Download都費事。且看曾是HMV排行榜榜首的鄧穎芝,今次連前四十位不入。所以我一向相信下載數字的多寡,甚於唱片銷量榜的高低來定論一位歌手的受歡迎程度。

首選:電光火石(featuring Eddie@EO2)

相關網頁 | 全碟歌詞 | 試聽連結