Eric Kwok,甜到漏嘅《廣東大碟》

廣東大碟 | Eric Kwok

Silly Thing

評分:71

老實講我對Eric Kwok冇乜印象,知道郭偉亮個名又唔知道佢係點樣,記得有Snowman同Swing又唔記得佢哋有啲咩歌。明明係半個幕後,又唔清楚佢啲歌係乜風格,明明係半個幕前,又淨係清楚佢同葉佩雯一齊,寫晒成張《On My Own》嘅歌。

冇晒印象仲好,當新人聽。

第一plug嘅《晏》我覺得麻麻哋,聽落好順耳但都係爭啲爭啲,感覺好似《愛得太遲》咁呻苦,同成張碟甜甜蜜蜜嘅風格一啲都唔夾,好彩好快搵《應承》做第二plug,呢首真係掂好多,節奏慢得來唔會訓著,好甜好冧好暖笠笠,編曲好有節日氣氛,唔怪得近排播到爛晒都咁受歡迎。

不過要數成張碟最突出嘅,我會揀中間嗰幾首,《是但,求其,冇所謂》好似去到加勒比海嘅沙灘一邊行一邊吹口哨,《冇得彈》玩Big Band,編排好順,好熱鬧,但冇犯到妹仔大過主人婆嘅毛病,跟住唱之外唔會覺得嘈過龍。去到最大聲都係玩少少Punk嘅《囉囉攣》,爽到暈,好耐冇聽過會甜到入心嘅快歌,加埋林若寧嘅詞玩得好正,同啲歌好貼好出,生鬼得嚟又唔覺得肉麻,捉得到叫做《廣東大碟》呢個主題嘅神韻,要傳神其實真係一啲都唔簡單,用粵語入詞,仲要係情歌,又唔係玩Rap,分分鐘一下唔覺意就變成尹光。如果要就住就住,半文半白,好似跟住嗰幾首小品《論盡》、《而家》咁,淨係得個歌名係廣東話,內容都係文縐縐咁樣,點都係隔咗一層,唔夠到肉,苴咗啲。

一個人嚟講呢隻碟係Eric Kwok送畀葉佩雯嘅,一班人嚟講呢隻碟係畀麻甩仔嚟氹女仔嘅,一張甜到漏嘅《廣東大碟》。

首選:囉囉攣

相關網頁 | 全碟歌詞 | 試聽連結

延伸閱讀:Eric Kwok【廣東大碟】唱好自己