港女的大姨媽

港女,佢叫麗港,今年十九歲,自細喺沙田區長大,讀書成績唔喺太叻,中五之後就出嚟好勤力咁做嘢,平時又幾慳,佢話想儲筆錢,有機會嘅話第日再讀書。

而麗港嘅大姨媽,即係親戚口中成日提住嘅表姐,個樣都有少少似鄭裕玲,幾年前開始由大陸落嚟探佢,每月一次到啦,每次都嚟住幾日。起初麗港係有少少唔知點反應,不過都適應到,學阿媽話齋好快就慣。

譬如唔識講大姨媽嘅家鄉話,但慢慢都叫聽得明,係大聲咗啲。又或者大姨媽半夜去廁所貪方便唔閂門,又唔記得沖廁,聽阿媽話其實都好小事,人同人一齊唔多唔少都會有磨擦㗎啦。

況且大姨媽本身生活都應該愈來愈好,次次嚟嘅時候又會帶好多家鄉特產畀佢哋,麗港因為睇得大陸黑心食品嘅新聞多,開頭都唔願食,不過大姨媽話佢自己都食咗好多年啦,而阿媽都話放心食,咁咪食囉。

另外大姨媽每一次仲會喺成家人面前畀封利時阿媽,話係一份心意,多謝我哋成日都帶佢去玩,帶佢食好嘢咁。

咁照計大姨媽份人其實都冇乜嘢,不過直到年幾前,大姨媽嚟得愈來愈密,要麗港成日陪佢出去,每次使好多錢,買好多嘢,金呀、補品呀、名牌手袋之類帶返上大陸。咁麗港放咗工之後好多時都好攰,一齊出去見到大姨媽咁洗錢法,自己就日日咁做,感覺好差。

然後有一日,打開門竟然見到大姨媽帶埋個好耐冇見,個樣都唔認得嘅表妹小京落嚟,話小京要喺麗港屋企住一段長時間。

跟住阿媽就吩咐麗港讓張床出嚟畀表妹。麗港當然好唔開心,自己放工返到屋企都想有自己嘅私人空間,有張舒服嘅床唞吓。

麗港覺得要同阿媽傾吓,但問題係佢阿媽呢幾年就愈來愈沉迷打牌,成日都唔喺屋企,打親電話畀阿媽,一係話唔打閒趕住收線,一係就索性唔聽,留言都唔覆。

就咁樣麗港一家人就開始咗同小京一齊住嘅生活。

所謂相見好、同住難,而家做咗小京口中嘅表姐港、表姐港就生活得愈來愈忟。

好多時放工之後仲要煮埋飯畀全家食,但呢位小京表妹就話唔啱胃口,想食開佢自己中意食嘅。大姨媽話遷就下小京,麗港就忍咗去。

不過有好多嘢,唔係話就到就就,其實小京都住唔慣,兜口兜臉對麗港講佢間房好細,張床唔夠佢屋企嗰張舒服,又話聽唔明麗港講乜,又話大家同一個家鄉,點可能唔識講家鄉話。

終於麗港同小京鬧咗次大交,導火線係出於屋企個坐廁。因為小京不嬲用開蹲廁,好多時都會踎咗上去,有一朝麗港起身發現廁所板有啲屎漬,當堂好慶,就係咁同小京嘈起上嚟,麗港仲嬲到講晒粗口話小京係寄生蟲,要趕小京出去,最後仲搞到大姨媽即刻落嚟問咩事蝦佢個女。

起初大姨媽問有咩證明啲屎漬係佢果女整嘅,講吓講吓就話佢每次嚟都有畀錢麗港阿媽,唔係白食白住,鬧麗港點解可以咁樣對自己嘅表妹,仲話佢遺傳咗佢死鬼老豆狗眼看人低啲衰格,點解唔學下麗香咁明白事理。

麗香,即係麗港嘅孖生家姐,果樣當然同麗港生得好似,不過性格上都講得上係南轅北撤,唔係好夾。而且麗香讀書成績叻啲,喺屯門嘅嶺南大學讀緊,因為住宿舍嘅關係,好少返沙田嘅屋企。

不過炒大鑊呢單嘢麗香當然知啦,因為果晚佢都喺屋企,只係喺間房度冇出嚟,因為要溫書應付考試。

而麗港真係好慶,諗住同麗香訴吓,點知麗香一早已經唔見人,返咗大學去考試。

惟有等到嗰晚先打電話同麗香傾,諗住有人開解下。

點知傾唔夠兩句,兩個人又開始鬧交嘞。

港:究竟你明唔明呀?

香:我點會唔明呢?我都同大姨媽住過啦,但係人哋喺大陸落嚟啫,你鬧人寄生蟲就係唔啱,仲夠膽講趕人出去,嗰個係你表妹呀!

港:咁我直頭係你阿妹啦,你都係唔明,我唔中意佢哋根本唔關佢哋喺邊度嚟嘅事,我係頂唔順佢哋嘅行為呀,做錯咗仲死撐。

香:我幫理不幫親,你冇做錯過咩?記唔記得你嗰年暑假去加拿大阿叔度住呀,你仲將條巾沖落廁所,塞晒呀?

港:咁我以後仲有冇咁做呀?

香:總之你講粗口鬧人寄生蟲就係錯撚晒啦!點解你唔學習包容一下,唔好覺得自己做咩都高人一等,人人生活習慣梗係有唔同㗎啦,佢做錯咗咪同佢講囉。

港:我冇講咩,但次次都係咁,仲話返我轉頭。咩大姨媽老啦,習慣好難改。表妹夠好生啦啩,咪一樣咁?乜都遷就,係咪要將個廁所拆咗去改造踎廁先得呀?

香:你唔忍嘅話想點呀,唔通要打交上差館咩?你成日嘈都解決唔倒,我返到嚟都想靜吓睇吓書㗎。仲有點解你唔同阿媽講?我覺得同阿媽講先係辦法。

港:你唔係唔知阿媽成日玩失蹤,返到嚟又入房瞓,話好攰遲啲先傾,有次仲話我咁唔中意,有本事就搬走,仲話可以安排我搬去大姨媽度住,痴線。我雖然揾得唔多,但都有畀家用㗎,仲叫我搬出去。

香:我明呀,但係總之你就唔好再發火,我搵日同你一齊同阿媽三口六面講清楚。

港:搵日搵日,咁搵到幾時呀?

誰是誰, 大家心中有數,可是我們太過習慣以各種親人關係形容彼此的同時,卻忘記了所有比喻再貼切也有失真的情況。一些看來普通不過的家庭糾紛放到現實裡亦未必容易化解,更何況是現在的衝突呢?