人生不過三萬天,知足、感恩、正能量

人生不過三萬天,知足、感恩、正能量

人生不過三萬天
有人話最快樂嘅時候係讀書嘅日子
不過讀完大學都未到一萬
然後返工放工循環萬幾天
好命嘅話咪可以安享晚年囉
人生苦短 日日咁多怨氣為乜呢

點樣為之好命 首先要知足
上唔到車好慘咩 咁住公屋呢
住公屋好慘 咁住劏房呢
住劏房好慘 咁瞓街呢
瞓街好慘 瞓醫院嘅咪更慘
人哋斌仔都做到再生勇士 你憑乜呻慘

想一朝發達咪買六合彩囉
買咗未必中 唔買就一定唔中
做人一樣 想出頭就唔該努力啲
唔好淨係要問社會為你做過咩
郁啲就遊行示威 阻塞交通之後又做到啲乜

記得要有正能量 咁就會天天天藍
搭唔起的士 咪迫地鐵囉
幾百萬人陪你迫 忍耐力就係咁迫出來
要改變世界 不如先改變自己嘅心態
大家樂難食咩 好多人連麥記都食唔起呀
做人真係要知足

香港始終係一塊福地 幾好都有
購物天堂 美食之都
交通便利 資訊發達
治安良好 青山綠水任縱橫
打個轉又可現身銅鑼灣
廿四小時無休 遊客都唔捨得走
只怕有人身在福中不知福
一個特區護照百幾個國家免簽證
一個回鄉證又可以無痛返大陸
口裡說不 事實上香港人呢個身份大把人想要呀
點能夠到你唔自豪呢

做人要識得感恩
收人利是都知道要講聲多謝啦 係咪
世上當然沒有無緣無故的愛
點計都好 大陸真係做咗好多嘢幫香港喎
自由行真係令到百業興旺喎
問吓中介 問吓鐘表行 問吓水貨兵團
睇吓邊個冇咗邊個唔得
人家用簡體字你咪當文化交流囉
細路仔小小一督尿就放到無限大
淨係記住人家嘅唔好 又點會開心呢
學識去包容 人嘅正能量都會多啲

人生不過三萬天
其實最快樂嘅時候唔單止淨係得讀書嘅日子
只要學識知足 感恩 正能量
就會有好日子過
Do you hear the people sing
你咪當人唱K囉

其實好多人都慣㗎啦
慣咗低頭 慣咗認命 慣咗多一事不如少一事
從來冇諗過點解黑人同白人而家可以坐埋同一架巴士
從來冇問過點解女人當年會冇投票權
從來冇望過點解兩個基佬將來可以光明正大咁結婚
不聞不問 人生不過三萬天
真係好快過
好快咁 自欺欺人的過