關於森美半裸愛神封面被禁

香港真係咁多年都冇進步過。

猶記得多年前淫審處將大衛像評為不雅已貽笑大方,成為本城歷史的一大笑柄,怎知多年來的荒謬一直沒有停過。三點畢露好,三點不露又好,總之為免有人投訴,防範於未燃,官方的、商家的,一聲不准就覺得乾手淨腳好辦事。

無論森美新書《來!戀愛大作戰!》的封面你閣下喜歡與否,也扯不上不雅兩個字吧,原來太少布也可以是拒絕的理由。但我可不是要以此再一次印證社會的偽善,而是要問問大家,為什麼香港可以多年來沒有進步?

原因就是政治上的停滯不前,牽一髮動全身,我們不能作主的同時,發出的聲音也不被聽見,做人可以有選擇的觀念不能像種子落在心裡發芽,所以面對任何大小事情亦是待宰的羊,例子天天有,在公在私透過不同的機構好好將我們分類、處理、包裝。

森美半裸愛神被禁 轟港鐵歧視

繼薛凱琪嘅「裸獅」唱片封面想喺港鐵落廣告,被人以太性感為由拒絕, DJ森美嘅新書都遭逢此厄運。

森美將喺書展期間推出新書《來!戀愛大作戰!》,以心理學角度講男女交往嘅拍拖大法,於是諗咗用歐洲一個愛神丘比特石像嘅身, key上森美個頭嚟做封面相,點知港鐵方面以太少布為由拒絕佢哋落廣告。

「纖體廣告仲少布」

森美噚日接受訪問講起都氣憤,佢話:「又冇 show重要部位,連性感都講唔上。」佢話自己冇咁 fit,所以用石像,仲話:「如果我咁fit就學o靚模出寫真啦,好奇怪o靚模仲可以喎,港鐵有好多纖體廣告仲少布啦,係咪歧視男人?」

卒之出版社要加黃條遮住石像下半身先可以過關,森美話:「其實好冇必要,石像係藝術品,同色情無關,我本係文字書,冇理由色情,唔係裸露身體就叫色情,唔通冲凉係鹹濕事咩?咁係好差嘅教育,色情同情色嘅分別佢哋識唔識?」

森美話:「我打算喺節目開放畀大家討論,究竟我個封面係咪淫穢,我都想知究竟係有人過份道德退後,定係我過份前衞,究竟香港社會嘅道德同藝術標準喺邊?」森美話希望賣書時唔使包黃條,但出版社決定咗包埋。

香港蘋果日報